Бујар Османи се произнесе јавно преку општествената мрежа по локалните избори на 19 ноември, кога ја изгуби битката за претседател на општина Чаир. Во долга објава на својот фејсбук-профил Османи нагласи дека за него „загубата не е крај, туку момент на размислување и пренасочување“. Тој зборуваше за „молкот по изборите“, за „лекциите, кои ги научил по изборите“ и за неговото „враќање во професијата како хирург“. Ова го пренесе информативниот портал на албански јазик „Алмакос“.
Натаму порталот наведува: „Загубата не е крај, туку прекалибрирање на насоката. Таа ве учи и ви дава уште повеќе трпение, емпатија и нова амбиција: не да се искачувате, туку да градите.“ – напиша Османи.
Во својата порака преку општествената мрежа тој посочува дека „политиката честопати ги наградува претставувањата повеќе од чесноста“, но и оти за него „лидерството не се мери според позицијата, туку според ставот“. „Не се повлеков, туку се прекалибрирав. Тука сум, со повеќе искуство, повеќе смиреност и поголема убеденост дека вистинскиот пат не е оној, што ве крева привремено, туку патот, кој ве држи исправени засекогаш.“ – напомна Бујар Османи.
Тој напиша дека по „загубата на локалните избори ѝ се вратил на својата професија како хирург“, опишувајќи го ова враќање како „начин да ги пронајде рамнотежата и смиреноста што му недостасувале“. Тој додава дека „загубата му послужила да ги преиспита неговите мотиви и приоритети во служењето на јавноста“. – пренесе „Алмакос“