Од Авто-мото сојузот (АМСМ), преминот „Ники“, или „Меџитлија“ од македонска страна, ќе биде затворен за товарни возила од 10 до 16 часот, додека „Евзони“ или „Богородица“ од 11 часот е затворен за сообраќај на сите видови возила.
Блокадите на граничните премини во Грција започнаа на 30 ноември.
Грчките земјоделци ги почнаа протестите поради зголемените трошоци за производство и ниските откупни цени, како и поради скандалот со европските земјоделски субвенции (ОПЕКЕПЕ), за кој бараат да се утврди политичка и кривична одговорност и да се вратат украдените средства на вистинските корисници.
Додека на овие гранични премини има застој во сообраќајот, на другите гранични премини од македонска страна нема подолги задржувања.