Министерката за надворешни работи на Бугарија, Велислава Петрова-Чамова, во „исклучително позитивен тон кон Скопје“, како што вели во интервју за Бугарската национална телевизија (БНТ), со порака до Македонија да си ги исполни обврските од т.н. Француски предлог, во чие изготвување учествувала и таа, наместо „да бара конфликт со Софија“.
„Тонот кон Скопје од моја страна е исклучително позитивен, зошто во Бугарија тоа е една од темите по кои имаме апсолутно политичко мнозинство. И јас ќе се ангажирам за обврските што треба да бидат исполнети од страна на Скопје и за мене тие се обврски на ниво на Европската Унија. Не станува збор за билатерални односи, туку за односи меѓу земја-кандидат и Европската Унија. Мислам дека не треба да бараме негативности и место за конфликт и се надевам дека од другата страна ќе најдат политичка зрелост да се обидат да постапат на таков начин. Често не ја гледам, но останувам оптимист дека ќе се најде политичка желба од другата страна тоа да се случи. Нашиот став останува непроменет и тоа е ставот од 2022 година. Јас бев еден од луѓето што преговараа за таа позиција, така што многу добро ја познавам. Мислам дека имаме целосно единство како во Владата, така и во целата политичка класа во Бугарија за ова прашање. Навистина се надевам дека Скопје ќе најде начин да постапи така што ќе го фокусира вниманието кон исполнувањето на обврските, а не во барањето конфликт со Софија“, изјави шефицата на бугарската диполматија.
„Ова е европска позиција и ова беше главното достигнување во јуни-јули 2022 година. Тажно е што се враќам во Владата четири години подоцна, а нема напредок по ова прашање“, дополни Петрова-Чамова, заменик-министерка за надворешни работи од 2022 до 2023 година во Владата на експремиерот Кирил Петков, на која ѝ беше изгласана недоверба во Народното собрание токму поради Македонија.