Од денеска па сè до петок, во попладневните и вечерните часови се очекува нестабилно време на повеќе места низ државата, информираат од Управата за хидрометеоролошки работи. Најавени се пороен дожд, грмежи и засилен ветер, а локално се можни и услови за невреме со изолирана појава на град. Во Скопје денеска попладне, особено во делови од котлината, ќе има појава на нестабилност проследена со краткотраен пороен дожд, електрични празнења и засилен ветер.
– Граѓаните треба да бидат повнимателни во случај на електрични празнења, не се препорачува престој на отворено, особено не под осамени дрвја и метални конструкции – информираат од УХМР.
Во четврток времето ќе биде сончево и топло, со мала до умерена облачност. Попладне ќе се појави изолирана нестабилност со пороен дожд, грмежи и засилен ветер. Слична временска слика ќе има и во Скопје. Петок ќе донесе повторна промена, се очекува сончево и топло утро, но попладне повторно ќе се развие нестабилна облачност, со локални врнежи и услови за невреме. Можни се и електрични празнења, силен ветер и изолирана појава на град.
Од УХМР апелираат граѓаните редовно да ги следат метео-известувањата и да ги почитуваат препораките.
– Секојдневно ќе ја ажурираме прогнозата на нашата веб-страница и профилите на социјалните мрежи. Во случај на влошување, навремено ќе биде издадено предупредување – додаваат од Управата.
Во текот на викендот, времето ќе биде стабилно, малку посвежо, со умерен до засилен северен ветер. Од понеделник следува период на стабилно и потопло време со пораст на температурите.