Репрезентативецот и ракометар на „Еурофарм Пелистер“, Дејан Манасков (33) од Скопје, вчера вечерта бил приведен од полицијата во Охрид по завршувањето на ракометниот натпревар меѓу ГРК Охрид и неговиот клуб.
Според информациите од СВР Охрид, на 14 декември околу 20:20 часот, по натпреварот во спортската сала „Биљанини Извори“, Манасков при меѓусебното поздравување на играчите физички го нападнал К.А., помошен тренер на домашниот ГРК Охрид.
Портпаролот на СВР Охрид, Стефан Димоски, потврди дека Манасков е приведен, а по целосно расчистување на настанот против него ќе биде поднесена соодветна пријава, најверојатно за нарушување на јавниот ред и мир или физички напад.
Натпреварот заврши со победа на ГРК Охрид од 29:25 против „Еурофарм Пелистер“.
Од полицијата најавија дека во текот на денот ќе излезат со повеќе детали за нарушувањата на јавниот ред и мир поврзани со овој настан.