Опозициската СДСМ со денови јавно ја повикува владејачката ВМРО-ДПМНЕ да ја прифати нивната резолуција, која, според власта, би отворила врата за примање мигранти во Македонија. Меѓутоа, од Собранието потврдуваат дека резолуцијата на СДСМ сè уште не е доставена.
Претседателот на СДСМ, Венко Филипче, инсистира ВМРО-ДПМНЕ да докаже дека нема таен договор со Велика Британија за прифаќање мигранти.
Премиерот Христијан Мицкоски и високи функционери на ВМРО-ДПМНЕ ги демантираа овие тврдења, обвинувајќи ја СДСМ за ширење дезинформации и страв, и побараа реакција од Јавното обвинителство.
Во меѓувреме, ВМРО-ДПМНЕ и коалициските партнери поднесоа своја резолуција, со која експлицитно гарантираат дека нема да има мигрантски кампови или прифаќање мигранти, поништувајќи ги сите претходни аранжмани од времето на владата на Зоран Заев. Оваа резолуција денеска се очекува да биде усвоена во Собранието.
Пратеникот од ВМРО-ДПМНЕ, Бојан Стојаноски, изјави дека лагите на СДСМ се разоткриени: „Во изминатиот период бевме сведоци на тоа како СДСМ сака да внесе несигурност и вознемиреност во јавноста преку ширење на лажни информации, свесни манипулации и дезинформации. Токму затоа преку Резолуцијата. јасно се отфрлуваат и се поништуваат сите аранжмани од поранешната влада предводена од Зоран Заев поврзани со кампови за мигранти. За секое следно ширење на паника, лажни вести и манипулација на народот, кривично ќе се одговара.“
Темата за мигрантите останува една од главните точки на судир меѓу власта и опозицијата.