Претседателката Гордана Сиљановска-Давкова изјави дека укинувањето на балансерот било неопходно поради коруптивните ризици што ги создавал овој механизам.
„Не мислам дека воопшто станува збор за уривање, бидејќи балансерот, таков каков што беше, суштински водеше кон корупција и криминализација. Назначувањето на највисоките позиции беше лоцирано во рацете на поединци и тие стекнуваа енормна, речиси султанска моќ. Не го укинавме балансерот затоа што така сакавме, туку затоа што тоа беше наведено во извештајот“, рече Сиљановска-Давкова по отворањето на „Генералка викенд“.
Таа додаде дека за прашањето за нерезидентното државјанство, решенијата мора да се носат преку аргументи и широка јавна дебата.
„Прашањето е комплексно. Има држави во кои постои двојно државјанство, има држави во кои не постои. Денес сите се соочуваме со егзодус и недостиг од работна сила и зборуваме за човечки суштества кои, исто така, имаат право на живот“, рече претседателката.
За односите со новата бугарска влада, Сиљановска-Давкова истакна дека очекувањата треба да се упатат до премиерот Румен Радев, посочувајќи дека бугарскиот народ очекува стабилност, реформи и борба против корупцијата.
Таа ја оцени средбата со потпретседателката на Бугарија, Илијана Јотова, како пријателска, инспиративна и ветувачка кога е надвор од секојдневниот политички контекст.
Во врска со барањата на невладините организации за вето на Законот за минерални суровини, претседателката рече дека тие се „неверојатно важен елемент на општеството“ и заслужуваат „зелено столче“ во парламентот.
„Ниту еден закон не треба да се носи по скратена постапка, туку во редовна постапка, за да може гласот и аргументите на невладините да се чујат“, додаде таа.
Таа истакна дека државата мора истовремено да се подготвува за енергетските предизвици и да се грижи за заштитата на природата.