Македонија

Сиљановска Давкова го осуди говорот на омраза во салата Македонија во Куманово

Недоветни навивачи пукаа со куршуми на омраза на нашите сограѓани Албанци, ама нè погодија сите

Претседателката Гордана Сиљановска Давкова го осуди говорот на омраза во салата Македонија во Куманово на кошаркарскиот меч Македонија : Романија кога група млади луѓе членови на навивачката група Кумани користеа говор на омраза против Албанците.

Во објава со наслов ,,(Не)научена лекција” Сиљановска Давкова го осуди овој инцидент и потсети на воведот во овој говор на омраза кога во средината на јули, на мечот меѓу Шкендија и велшкиот шампион ТНС, се случија расистичките навреди кон гостинскиот фудбалер Арманд Оте.

 

,,Го шокиравме сиот спортски, но и поширок свет којшто со право запраша: Како е можно да се случи недоветен навивач емоционално да скрши врвен фудбалер до солзи, посегајќи по говор на омраза врз расна основа?

 

Срамот падна на сите: на домаќинот, на клубот, на присутните, на градот, на државата, на спортот! Логичниот заклучок беше: „Не смее да се толерира ваквото однесување на ниту еден стадион, во ниту еден спорт, никогаш и никаде“.

 

И… заради нашата, по кој знае кој пат, спортска неписменост, со право не стивнуваат реакциите на ужасниот инцидент на кошаркарскиот натпревар во Куманово, на којшто, неколкумина недоветни навивачи пукаа со куршуми на омраза на нашите сограѓани Албанци, ама нè погодија сите, па и себеси и, пак, сме засрамени.

 

Неспортски е да се злоупотребува спортскиот терен за „вежбање“ говор на омраза, навредување и сатанизација со отровни убиствени зборови – проектили!

По толку изгубени човечки битки на спортските терени, мора да кажаме јасно и гласно: Никогаш повеќе, каде и да сме, со кого и да се натпреваруваме, нема да дозволиме спортскиот терен да прерасне во гладијаторска навивачка арена.

 

Се разбира, првата лекција „како се навива“ се учи дома, а по неа се нижат други: во градинка, во основно, во средно, на факултет, во клубот, на натпреварот, во публиката”, пишува претседателката за инцидентот во Куманово.

 

Таа дава конкретен предлог.

 

,,Пред секој натпревар, да се упати предупредувачка порака до гледачите да ги исклучат лошите мисли и пораки, како што тоа го прават со мобилните телефони, ,,оти натпреварот не е битка до смрт, туку витешка борба до заслужена победа, дека од публиката се очекува бодрење, поддршка и охрабрување, а не навредување и повредување, дека треба да победи подобриот, но и да се почитува другиот, дека навивањето е награда, а не казна”, смета Сиљановска Давкова која потсетува дека срамот не е само на оние чии зборови повредуваат, зашто ги погодуваат не само оние во салата или на теренот, туку и оние што ги гледаат и слушаат заради нивниот неограничен домет.

 

,,Мора да ѝ се спротивставиме на навивачката омраза, да го култивираме и да го облагородиме навивањето, да учиме и да научиме како се навива, односно како не се навива, да ја засилиме битката против предрасудите и судири меѓу „ различните“, мора да се запознаеме и познаваме, мора да спречиме излив на омраза, да реагираме навреме, да лечиме дела од омраза, да ја санкционираме”, порачува претседателката и додава:

 

,,Страсното навивање никогаш не е навредливо и агресивно. Ни треба азбука на навивањето како спортско уживање, навивачко описменување, оти Пирова е спортската победа ако е проследена со физичка или говорна агресија”.

Најнови вести од: Македонија

Зошто се повеќе македонски студенти заминуваат да учат во странство?!

Во академската 2024/2025 година бројот на странски студенти во Словенија достигна 11.918, што е пораст од 12,8% во однос на претходната година. Повеќе од 1.000 од нив доаѓаат од само четири земји, меѓу кои и Македонија.

За финансирање на кампањата за локалните избори треба да се потрошат 9,7 милиони евра

Од Државната изборна комисија кажаа ако во иднина се продолжи со финансирање на изборната кампања со пари од буџетот, тогаш ДИК не треба да биде институцијата која ќе ги дели парите на медиумите.

Обвинителство отвори истрага за криминална група која се товари за даночни измами и перење пари

Денешната акција спроведена на повеќе локации низ државата, односно на територија на општина Липково, Куманово и Желино е резултат на двегодишна предистражна постапка што ја водеше Основното јавно обвинителство за гонење на организиран криминал и корупција во тесна соработка со Управата за финансиска полиција, велат од Обвинителството. Постапувајќи по кривичната пријава, надлежен обвинител од ОЈО […]

Во јуни 100 отсто од потрошената струја била од домашно производство

Според податоците од државниот завод за статистика, во јуни годинава во земјава вкупно се потрошени 296.651 мегават часови електрична енергија, 8,334 милиони нормални кубни метри природен гас, 357.500 тони јаглен и 101.113 тони нафтени продукти. 100 проценти од потрошената електрична енергија била од домашно производство, а 99,9 отсто од вкупно потрошениот јаглен се употребени за […]

To top