Објектот на Културно-уметничкото друштво „Српски вез“ во Куманово ноќта меѓу петокот и саботата бил мета на вандалски напад. На надворешните ѕидови од објектот биле испишани графити со содржина „УЧК“.
Министерот за локална самоуправа, Иван Стоилковиќ, на социјалната мрежа Фејсбук објави снимка од безбедносните камери на која се гледаат две лица кои пристигнуваат со автомобил пред објектот. По неколку влегувања и излегувања од возилото, тие се приближуваат до влезот на културно-уметничкото друштво, ги испишуваат графитите и пораките, а потоа го напуштаат местото.
Осудувајќи го инцидентот, Стоилковиќ порача дека станува збор за насилнички чин врз простории каде што се формираат млади генерации преку фолклор.
„Ксенофобијата со примеси на шовинизам константно присутна во јавноста, посебно изразена последниве две години од учеството на ДПСМ во Владата, пропратено со незаслужениот молк на јавноста почнува да дава видливи резултати кои се многу поголеми од вандализмот на оваа дивљачка хорда, чие насилничко, деструктивно и нецивилизирано однесување врз имотот и просториите каде со фолклор (КУД Српски вез) се занимаваат повеќе од 200 деца и скрнавењето со натписи УЧК кое и државата и јавноста би требало најстрого да го санкционира. За политиките кои го потикнуваат ваквото однесување во некоја друга прилика. Никој нема да биде изоставен“, напиша Стоилковиќ на Фејсбук.
Засега нема официјални информации за идентитетот на сторителите. Од Министерството за внатрешни работи потврдија дека се преземаат сите потребни оперативни активности за расчистување на настанот.
„Настанот е пријавен во СВР Куманово. Извршен е увид и се преземаат мерки за расчистување на случајот“, наведуваат од МВР.
Надлежните институции треба дополнително да утврдат кој стои зад оштетувањето на објектот и дали станува збор за изолиран инцидент или организирана провокација.