Советник на екс вицепремиерот Артан Груби кој од кривичен прогон избега во Албанија стана директор на ФК Тирана.
Омер Буњаку, советник на поранешниот вицепремиер А. Груби и поранешен член на надзорниот одбор на Државна видео лотарија, од денес е нов спортски директор на ФК Тирана, објави клубот од главниот град на Албанија.
Неговиот екс шеф веќе една година е избеган во Албанија.
Омер Буњаку, предводник на „Шверцери“, и Шпат Касапи, популарен пејач, од 13 ноември 2020 година беа советници на тогашниот првиот вицепремиер во Владата и министер за политички систем, Артан Груби, објавин „Призма“.
Биографијата на Буњаку е кратка, има едвај 70 збора, а половина од нив се потрошени да се опише ангажманот како актуелен советник на Груби. Тој, наведува „Призма“ повикувајќи се на биографијата добиена од Владата, дипломирал туризам и менаџмент, директор е на фудбалскиот клуб Шкупи, а покрај македонски и албански зборува и англиски и турски јазик.
„Буњаку е познат како предводник на навивачката група „Шверцери“, истата група чиј основач бил Груби. Има ‘сочно’ полициско досие и проблеми со законот од 2011 година. Сегашниот советник на Груби учествувал и во тепачките на Кале во 2011 година за изградба на црквата-музеј. Не само што учествувал, туку тогашниот заменик-министер за полиција, Џевад Бучи, привремено го ослободи, кога пред телевизиските камери му ги извади лисиците. Потоа неговото име се најде во пресудата за педесетина осудени за овие инциденти што ја вознемирија јавноста и долго ги разбрануваа меѓуетничките односи пред една деценија. По објавата на пресудата за осудените, јавно со осуда реагирале и Груби и лидерот на партијата, Али Ахмети“, објави во 2020 година Призма.