„Ова е четврти пат како ВМРО-ДПМНЕ е цел на политичко разузнавање, но ова нема нема да помине како претходните случаи, кои не завршија со правда.“ – изјави пратеникот од ВМРО-ДПМНЕ Бојан Стојаноски вечерва, на 10 септември 2025 година во гостувањето во „Вести Плус“ на Канал 5 телевизија, осврнувајќи се на скандалот со прислушкувањето. Според него, СДС направи државен удар со користењето на ресурсите на АНБ и АР повеќе од пет години и тоа за политички и лични цели.
„Единствени, кои треба да бидат и се уплашени од ова, се СДС и личностите, што арбитрираат околу нив, особено поранешниот директор, којшто сега гледавме дека дава панични интервјуа, бидејќи тие знаат кои деликти сториле. Ова е нешто, што се граничи со државен удар, бидејќи многу сериозни ресурси на АНБ и АР повеќе од пет години биле користени за политички и лични цели на личности блиски до претходната власт.“ – посочи Стојаноски.
Тој запраша зошто досега јавниот обвинител, и покрај сите докази, нема објавено во јавноста дали е започната истрага, бидејќи, како што нагласи, постои оправдано сомневање дека и јавното обвинителство е вмешано во овој скандал.
„Добро знаат од СДС дека прашањата, што ги поставуваат на прес-конференции наместо на ВМРО-ДПМНЕ, треба да му ги постават на Љубомир Коцевски и на ЈО и од таму да ги бараат одговорите. Ова е скандал, за којшто ние имаме сериозни сомневања дека можеби ЈО е вмешано во ова.“ – кажа пратеникот Стојаноски.
Тој нагласи дека ова е четврти пат како ВМРО-ДПМНЕ е цел на политичко разузнавање и напомна оти тоа нема да помине како претходните случаи, кои не завршиле со правда.
„Ова е четврти пат нашата политичка партија да биде нападната од еден триаголник на политичко разузнавачко бизнис лоби. Но можам да гарантирам дека ова мочуриште на овој триаголник ќе биде исушено и оти конечно овие луѓе ќе одговараат. Кој ја издал наредбата за да бидат оперативно вработувани овие личности, за кои цели, кој ги избрал личностите, што треба да бидат следени, и каде завршувале тие информации? Нека не се лажат дека ова ќе помине како претходните случаи со ваков удар или упад во разузнавачките служби! Овој скандал ќе биде расчистен докрај и секој, до последниот, ќе одговара!“ – заклучува Стојаноски.