Пет противпожарни возила од австриската покраина Тирол, заедно со опрема, црева и пумпи, ќе помогнат во побрзото и побезбедно гаснење на пожарите во Македонија.
Минатата недела тие им беа предадени на општини во Македонија, објави австриската државна телевизија ОРФ. Покрај тоа, 12 пожарникари од Македонија во моментов завршуваат дополнителна обука во Тирол.
Државната министерка за безбедност Астрид Мајр изјави дека обезбедените возила и опрема се сè уште целосно функционални, но се деактивирани во Тирол од различни причини.
Македонскиот амбасадор Освит Росоклија рече дека проектот за противпожарна заштита помеѓу државата Тирол и Македонија има за цел формирање доброволни противпожарни друштва. Тој ја гледа поддршката како „израз на вистинско партнерство, солидарност и пријателство меѓу двете држави, особено со покраината Тирол, која великодушно и визионерски го поддржува овој проект“.
Командантот на покраинската противпожарна бригада Јакоб Унтерладштетер истакнува дека многу пријателства се формирани и преку партнерството со Хрватска. „Со нетрпение го очекуваме ова со нашите колеги во Северна Македонија“.
По посетата на Тирол, трите македонски општини Куманово, Тетово и Охрид развија концепти за модерна, волонтерска противпожарна служба. Тиролскиот проект-менаџер на партнерството за противпожарна служба, Петер Логар, ја набљудуваше имплементацијата на самото место.
„Поддршката со опрема, возила и обука е можна само ако веќе постои база“, рече Логар. „Ова се првенствено волонтери кои се подготвени да служат како пожарникари. Во исто време, потребна е соодветна инфраструктура, како што се гаражи за возилата. Сите три општини, вклучувајќи ги и околните села, вложуваат голем напор тука и презедоа соодветни чекори“.
Противпожарната служба во Општина Куманово, која има население од над 100.000 жители, сега ќе има ротирачка скала. Во Тетово, каде што има неколку хемиски фабрики, во иднина ќе има возило за опасни материјали, а во Охрид пожарникарите ќе бидат обучени за посебен метод на гасење пожари, бидејќи тесните улици на стариот град се невозможни за движење со противпожарно возило.