Македонската пливачка легенда, Томи Стефановски по вторпат плива за поголема инклузија во спортот.
Томи ја носи пораката за заедништво и сплотеност – инспирација за сите лица, поддршка на лицата со атипичен развој.
„Со голема гордост би сакал да го претставам едно од моите најголеми достигнувања во кариерата, а тоа е препливувањето на каналот Ла Манш на 14 Август 2009та година. Таа година беше 50-годишен јубилеј од првото препливување на каналот од страна на еден Mакедонец (Нико Нестор, 1958) и 40-годишнината од препливувањето на првата Mакедонка (Атина Бојаџи, 1969). Мојот подвиг траеше цели 7 часа и 42 минути, резултат кој е 13ти на вечната листа во 149-годишната историја на препливувањата на каналот (Капетан Метју Веб, 1875).
На 14ти Август 2025 година ќе бидат одбележани 16 години од моето препливување на каналот Ла Манш, и по тој повод ќе се одржи хуманитарен настан на кој ќе се обидам да препливам 16 километри по Охридското Езеро од месноста Пештани до Црквата Канео во Охрид, па назад до Охридското пристаниште.
Мојот јубилеј би сакал да го посветам кон хумани цели, поточно да ја подигнам свеста и да креирам подобри услови за лицата со атипичен развој и инвалидизираните лица во спортот и физичкото образование. Заедно со вас и вашата поддршка ќе им дадеме можност на многу лица и деца да го достигнат својот потенцијал, да уживаат во благодетите од спортот и да имаат поисполнет живот“, вели Томи Стефановски.