Во срцето на Скопје вечерва повторно блеснаа три моста. Камениот мост, Мостот Око и Мостот на уметноста добија ново декоративно и архитектонско осветлување, кое ги истакнува нивните линии и им враќа сјај што подолг период недостасуваше.
Свеченото пуштање во употреба го изведоа градоначалникот на Скопје, Орце Ѓорѓиевски, и градоначалникот на турската Општина Есенлер, Мехмет Тевфик Гоксу. Проектот е плод на Протоколот за пријателство и соработка меѓу двата града.
„Камениот мост повторно блесна – гордоста на Скопје во полн сјај!“, напиша Ѓорѓиевски на Фејсбук, споделувајќи ги првите фотографии од новоосветлениот симбол на градот.
На настанот присуствуваа и амбасадорот на Турција Алпер Акташ, извршниот директор на Халк банка Фатих Шахбаз и почесниот конзул Ајдован Адемоски. Градоначалникот посебно ја истакна улогата на новото осветлување:
„Новото осветлување ја истакнува убавината на неговите сводови и му дава посебна величественост во срцето на градот. Уште една причина да застанеме, да погледнеме и да си кажеме колку убаво Скопје имаме!“
Тој потсети дека Камениот мост не е само сообраќајна врска, туку живо сведоштво:
„Во неговиот камен се врежани векови историја. На него се среќавале генерации, започнувале пријателства и се создавале спомени што траат цел живот.“
Според Ѓорѓиевски, обновувањето на осветлувањето е дел од пошироките напори за зачувување и уредување на препознатливите обележја на градот. Тој им се заблагодари на партнерите од Есенлер и на сите што помогнале проектот да стане реалност.
„Од договорена соработка до светлина што вечерва ја гледаме сите – така се гради пријателство што остава трага“, нагласи градоначалникот и додаде:
„Камениот мост опстојувал со векови. Нашата задача е да се погрижиме и генерациите по нас да го гледаат со истата љубов и гордост.“