Утрово низ Македонија беа измерени ниски температури, со најстудено на Попова Шапка каде што термометарот покажа -11 степени Целзиусови, соопшти Управата за хидрометеоролошки работи (УХМР).
Температури под -8 степени се забележани во Куманово (-9), како и во Скопје-Петровец, Берово и Крива Паланка (-8 степени).
Во Тетово, Демир Капија и Маврови Анови утринската температура изнесуваше -7 степени, додека -6 степени се регистрирани во Скопје-Зајчев Рид, Струмица, Велес, Штип, Виница, Кавадарци и Крушево. Во Прилеп измерени се -5, во Гевгелија и Претор -3, а во Охрид и Битола -2 степени.
Во изминатите 24 часа до 7 часот утрово, најголеми количини на наврнат воден талог се регистрирани во Охрид (5 л/м²), Маврови Анови (3 л/м²), како и во Тетово, Демир Капија и Пожар (по 2 л/м²). По еден литар по квадратен метар наврна во Крива Паланка и Крушево. Снежна покривка од 1 сантиметар е измерена само во Крива Паланка.
Според прогнозата, денеска времето ќе биде променливо облачно со сончеви периоди. Кон крајот на денот и во текот на ноќта во западните и северните делови се очекуваат повремени врнежи од дожд, а на планините од снег. Ќе дува слаб до умерен јужен ветер. Максималните дневни температури ќе се движат од 3 до 9 степени.
Во Скопје ќе биде променливо облачно со сончеви периоди, а во текот на ноќта можен е повремен дожд. Максималната температура во главниот град ќе достигне до 4 степени.