Нови 100 амбулантни возила вредни 7,5 милиони евра треба да бидат набавени за македонското здравство, одлучила Владата на вчерашната седница.
„Ова ќе значи побрза и поефикасна интервенција во итни случаи, навремен транспорт на пациенти до секундарно и терциерно ниво, подобра покриеност во урбаните и во руралните средини“ – напиша министерот за здравство Азир Алиу на својот Фејсбук профил.
Алиу информираше и за друга одлука поврзана со здравствениот систем: Владата одлучи паркингот на Клиничкиот центар „Мајка Тереза“ во Скопје да биде запишан како државно земјиште, со што се отстранува правната пречка за потпишување договор меѓу Клиничкиот центар и ЈП „Градски паркинг – Скопје“.
„Со овој договор ќе се овозможи модернизација и значително зголемување на капацитетите за паркирање, но и воспоставување ред. Предвидуваме комплетен мониторинг на паркирањето, информативни табли и дигитален водич што ќе ги насочува граѓаните. Целта која ќе ја постигнеме ќе биде пациентите и вработените да имаат функционален, безбеден и организиран пристап до комплексот клиники“ – истакна министерот Алиу.
Овие одлуки се дел од напорите за подобрување на здравствената инфраструктура и услугите во земјата.