На 24 март 2026 година, во Валандово, полициски службеници од СВР Струмица – ОВР Валандово лишиле од слобода 72-годишен жител на градот, откако тој физички ја нападнал својата 68-годишна сопруга во семејниот дом и ѝ нанел телесни повреди.
Според пријавата, инцидентот се случил околу 16:00 часот. При преземањето на службени дејствија, осомничениот агресивно се однесувал и кон полициските службеници, при што нападнал еден од нив.
Лицето е задржано во полициската станица. Со негова дозвола, извршен е претрес во неговиот дом, при што полицијата пронашла и одзела три пиштоли, една ловечка пушка, 45 куршуми и седум ловечки патрони, кои нелегално ги поседувал.
За настанот е известен јавен обвинител од Основното јавно обвинителство во Гевгелија. По целосно документирање на случајот, против 72-годишникот ќе биде поднесена соодветна кривична пријава.