СУТКОЗ, единствениот репрезентативен синдикат за комунални дејности, заедно со ССМ, ја информираат јавноста дека Извршниот одбор на Синдикалната организација на СУТКОЗ при ЈП „Комунална хигиена“ – Скопје одржал состанок на кој се дискутирало за состојбата во претпријатието. На состанокот биле поканети директорот на претпријатието, Сабахадин Рустеми, и Управниот одбор, но тие не присуствувале.
Од синдикатот истакнуваат дека платите на вработените со месеци се исплаќаат со задоцнување, иако, според нивните информации, на сметката на претпријатието редовно се префрлаат средства од наплатените сметки на граѓаните.
„И покрај доцнењето со исплатата на платата за месец септември, вработените совесно ги извршуваат своите обврски со ограничените ресурси што ги имаат. Недостигаат камиони за собирање смет, а дел од постојните не се во возна состојба поради недостиг на резервни делови“, велат од СУТКОЗ.
Од синдикатот нагласуваат дека одговорноста за оваа состојба не е кај вработените, туку кај раководството на претпријатието, кое не презема мерки за решавање на проблемите.
„Вработените и СУТКОЗ ќе ги преземат сите мерки што им стојат на располагање согласно законите и колективните договори – од поднесување кривични пријави до известување на Државниот инспекторат за труд. Притоа, ќе водиме сметка да не се доведе во прашање положбата или здравјето на ниту еден вработен, ниту здравјето на граѓаните на Скопје“, порачуваат од синдикатот.