Натаму Вреди истакнува: Целото раководство на ДУИ сѐ уште се прашува зошто после една година во бегство тој сам се пријави на граница и доби само куќен притвор. Факт е дека истече максималниот рок во кој можеше да му се продолжува притворот. Факт е дека Артан Груби ќе може да се движи само во Скопје и оти ќе треба редовно да оди на проверка во суд. Факт е дека за таа ограничена слобода на движење даде гаранција вредна 350 илјади евра како да се 100 денари.
Без оглед на театарот што му го приредија десетина негови лојалисти со навивачка пиротехника, исплашениот и блед лик на „кралот“ говори многу без воопшто да изусти збор. Иако Бујар Османи во интервју се обиде да го излиже тоа што го исплука за Артан Груби во кампањата за локалните избори, сепак тоа не беше доволно. Мораше уште повеќе да се понижи и како поранешен шеф на дипломатијата стана навивач за човек, кој е на црната листа на САД. Симптоматично, недостасуваше факелот на Али Ахмети, кој во неколку наврати со изјави неуспешно се обиде да си ја припише како личен успех замената на куќниот притвор со поблаги мерки за неговиот поранешен најблизок соработник и некрунисан наследник.
Дали Артан Груби добил задача да направи драматичен раскол во ДУИ? Како и да е, Вреди со нетрпение ја очекува неговата позната комуникациска ароганција, со која со невиден успех го поткопуваше рејтингот на ДУИ. Се додека е слободен и дополнително ја отежнува неопходната кадровска реформа во ДУИ, за нас нема подобра и посилна гаранција за успех на било кои избори, порачува Вреди во своето соопштение.