Владата, предводена од коалицијата Вреди, преку Министерството за транспорт, започнува нова фаза во изградбата на Железничкиот коридор 8 – проект со национална димензија и регионално значење. Со одлука на Владата, одобрен е грант од 3,7 милиони евра обезбеден од Европската инвестициска банка, информираше Вреди преку соопштение.
„Средствата се наменети за подготовка на нова проектна документација и спроведување на постапка за тендерирање. Паралелно, Јавното претпријатие за железничка инфраструктура ја започна и постапката за избор на надзор на изградбата, со цел да се гарантира транспарентност и ефикасност во процесот“, се вели во соопштението.
Заменик-министерката за транспорт, Калтрина Зеколи Шаќири, нагласи дека Министерството за транспорт е целосно посветено на развојот на железничката инфраструктура, сметајќи ја за клучна за економскиот напредок, регионалната соработката и националната кохезија.
Коридорот 8, кој треба да ги поврзе Македонија и Албанија преку линијата Скопје-Тирана до пристаништето во Драч, е дел од европските транспортни мрежи и има потенцијал да ја направи Македонија важен транзитен јазол на Балканот. Според Владата, овој проект надминува обична инфраструктурна инвестиција, претставувајќи симбол на економска интеграција, регионално поврзување и зајакнување на улогата на Албанците во регионот.