Управниот одбор на Фондот на ПИОМ донесе одлука за зголемување на посмртнината за пензионерите од 35.000 на 40.000 денари, одлучи , со што семејствата на починатите корисници ќе добијат поголема финансиска поддршка во најтешките моменти, дознава Плусинфо.
Одлуката е донесена поради значително зголемените трошоци за погребни услуги во земјава, а мерката е иницирана од Регистрираната организација за Солидарен фонд.
За да се обезбеди финансиска стабилност на Солидарниот фонд, месечната задршка од пензиите се зголемува од 140 на 150 денари.
Според Станка Трајкова, член на Управниот одбор на ПИОМ и претседателка на Сојузот на здруженија на пензионери на Македонија, ова минимално зголемување е неопходно за одржување на ликвидноста на Фондот.
„Бројот на пензионери постојано расте, а зголемувањето од 10 денари на месечно ниво создава значајни дополнителни средства кои овозможуваат навремена и сигурна исплата“, вели Трајкова.
Со зголемувањето на посмртнината за 5.000 денари, институциите настојуваат да го ублажат социјалниот притисок врз пензионерите и нивните семејства, во услови на продолжена економска неизвесност и раст на животните трошоци.