Изнаоѓање трајно решение за проблемот со отпадот во Скопје е причина за денешниот состанок на скопските градоначалници во рамките на ЗЕЛС. Претседателот на ЗЕЛС и кандидат на ВМРО-ДПМНЕ за градоначалник на Скопје, Орце Ѓорѓиевски, вели дека причина за состанокот, инициран од градоначалникот на Општина Центар, Горан Герасимовски, е нефункционалноста на ЈП „Комунална хигиена“ и претворањето на Скопје во „една голема депонија“.
Скопските градоначалници се собраа на едно место, одржан вонредниот состанок на ЗЕЛС кој го побара градоначалникот на Центар Горан Герасимовски. Пред состанокот Герасимовски изјави дека хигиеничарите од Центар работеле во две смени, а Комунална хигиена требало да се освести бидејќи вака ни се спрема комунално – еколошка катастрофа во градот.
Градоначалниците од Скопскиот Регион, со поддршка од општествено одговорни компании, во изминатите денови се обидувале да го амортизираат хаосот. Ѓорѓиевски најави дека ќе се бара поддршка и од колегите надвор од Скопје за расчистување на метежот и упати апел до раководството на „Дрисла“ да не вршат опструкции при влезот на механизацијата која ќе го транспортира отпадот.
Инаку, главниот град – Скопје со денови се дави во ѓубре, поради неисчистените контејнери и претставува опасност за појава на епидемија. Тротоарите пак околу комуналните садови се затрупапани со купишта отпад и дополнително ги загрозува пешаците кои се приморани да се движат по улица, но и безбедноста на учесниците во сообраќајот. Не е мала опасноста и од појава на глодари, кои се преносители на заразни заболувања.