Албанскиот премиер Еди Рама изјави дека протестите против планираното луксузно одморалиште на јадранскиот брег на земјата се засновани на дезинформации, јави ДПА.
Тој ги отфрли тврдењата дека зачуваната област се продава на инвеститори поврзани со семејството на американскиот претседател Доналд Трамп.
Фактите покажуваат дека нема договор за островот Сазан“, нагласи Рама. „Сето тоа се лаги“.
Тој посочи дека неговата влада сè уште преговара за заеднички деловен потфат за изградба на првото луксузно одморалиште во Албанија на островот Сазан и потврди дека Џаред Кушнер, зетот на Трамп, е меѓу групата потенцијални инвеститори.
Сепак, Рама силно ги критикуваше публикациите, за кои рече дека лажно тврделе дека „Кушнерите го добиле островот, а Албанија го продаде“.
„Албанија стана платформа за сиот бес против Трамп во светот“, посочи тој.
На Иванка Трамп не ѝ даваат да гради туристички комплекс во Албанија (ВИДЕО)
Оваа балканска земја, која бара членство во Европската унија, со недели протестира против инвестициските планови. Илјадници луѓе демонстрираа во главниот град Тирана, со судири меѓу демонстрантите и полицијата.
Покрај островот Сазан, проектите вклучуваат и приватни инвестиции на мал полуостров во близина на градот Звернец, чии дини ја делат лагуната Нарта од Јадранското Море. Областа е заштитено подрачје и живеалиште за многу видови птици и животни.
Рама рече дека прелиминарните истражувачки активности на локацијата биле привремено прекинати поради „притисок“, но додаде дека проектот на крајот ќе продолжи.
Премиерот нагласи дека се уште не се поднесени барања за градба ниту за Сазан, ниту за Звернец. Тој посочи дека ќе се вршат проценки на влијанието врз животната средина.
Според владата, ограничен и еколошки развој е дозволен во двете области.
Еколошките здруженија ги критикуваа амандманите на законот за заштитени подрачја на Албанија усвоени во 2024 година. Владата ги опиша промените како појаснување на режимот за заштита за овие области, но Европската унија рече дека амандманите ја ослабуваат заштитата на животната средина.
Рама ја отфрли оваа оценка.
Тој изјави дека „нема шанси“ земја кандидат за ЕУ како Албанија да спроведе проект што не е „целосно усогласен“ со критериумите на Европската унија за оцена на влијанието врз животната средина.