Албанскиот премиер Еди Рама на духовит начин одговори на новинарско прашање поврзано со временската рамка за членството на Албанија во Европска Унија, истакнувајќи ја неизвесноста што го карактеризира процесот на европска интеграција.
На прашањето на новинарите: „Кога Албанија ќе се приклучи кон Европската Унија?“, Рама кусо одговорил:
„Постојат три работи што не можат да се предвидат: Бог, сексот и Европската Унија.“
Неговата изјава привлече значително внимание во јавноста и медиумите, и беше протолкувана како духовит коментар за сложеноста и непредвидливоста на процедурите низ кои поминуваат земјите-кандидатки на патот кон полноправно членство во Европската Унија.
Албанија доби статус на земја-кандидат во 2014 година, додека формалните пристапни преговори со Европската Унија започнаа во 2022 година. И покрај одреден напредок во евроинтегративниот процес, засега не постои конкретен датум за нејзиното приклучување кон Унијата.