Турскиот претседател Реџеп Таип Ердоган присуствуваше на молитва во „Света Софија“, христијанска црква претворена во џамија, како дел од одбележувањето низ цела Турција на 573 години од освојувањето на некогашниот Константинопол (Цариград) од Османлиите.
„Денес е петок, 29 мај. По една случајност, имавме можност да се помолиме во ‘Аја Софија’. посетеноста на ‘Аја Софија’ исто така беше величествена. Токму на овој ден, Мехмед Втори Освојувачот тргнал кон ‘Аја Софија’ и заедно со жителите на Константинопол се помолил тука. Тоа е нешто особено убаво“, им изјави тој на новинарите, на кои им подели локум.
Годинашните одбележувања се совпаѓаат со третиот ден од Курбан-бајрам, а централен настан беше „Маршот на освојувањето“, за кој Гувернерството на Истанбул соопшти дека „десетици илјади жители на градот се обединиле под славното турско знаме“.
Ердоган присуствуваше и во официјалната програма во Конгресниот центар „Халич“, насловена „Од освојувањето на Константинопол до освојувањето на срцата“.
„Света Софија“ е поранешна православна базилика, која во текот на својата историја била претворена во џамија, подоцна во музеј, а денес повторно се користи како џамија. Од изградбата во 4. век до 1453 година служела како византиска катедрала на Цариград, освен во периодот од 1204 до 1261 година, кога била претворена во римокатоличка катедрала по заземањето на градот од крстоносците и основањето на Латинското царство. Како џамија објектот служел од 29 мај 1453 година до 1931 година, кога била затворена, а од 1 февруари 1935 година до 2020 година претставувала музеј. Во јули 2020 година повторно била претворена во џамија.