Голем шумски пожар предизвика евакуација во популарното туристичко место Сивири на грчкиот полуостров Халкидики. Поради брзото ширење на пламените јазици, властите мобилизираа речиси сите расположливи сили за ставање на стихијата под контрола, а локалното население и туристите беа итно повикани да го напуштат регионот.
Во акцијата за гаснење на терен се ангажирани 122 пожарникари, меѓу кои три специјализирани тимови за шумски пожари, како и 41 противпожарно возило, објави 4news.mk Од воздух интервенираат дури 9 авиони и 7 хеликоптери (од кои еден има координативна улога). Како поддршка во операцијата се вклучени и цистерни на локалните власти и тешка градежна механизација. Преку грчкиот систем за итни предупредувања „112“ беше испратена порака до сите што се наоѓаат во Сивири со насоки за итна евакуација кон Мола Калива.
Познатиот македонски музички продуцент и композитор Дарко Димитров, кој деновиве се одмора во Грција, се најде во непосредна близина на огнена стихија. На социјалните мрежи сподели видеа и фотографии од туристичкото место Сивири, на кои се гледа густ црн чад. На видеата се забележуваат и противпожарни хеликоптери кои постојано надлетуваат и фрлаат вода во обид да го стават пожарот под контрола. Според она што го објави Димитров, чадот брзо се шири во близина на објектите и плажата каде што има многу туристи, создавајќи паника и загриженост кај присутните.