„Грција нема да толерира никакво ширење на војната од Украина кон Медитеранот“, изјави денеска грчкиот министер за надворешни работи Јоргос Герапетритис, откако остатоци од поморски дрон беа откриени во близина на грчкиот остров Лефкада.
Тој рече дека Средоземното Море мора да остане зона на мир и дека грчките власти ќе се погрижат тоа да не стане нова арена на воени операции, објави „Катимерини“.
Грчките власти се сомневаат дека станува збор за украински камиказе дрон „Мамај“ опремен со експлозиви, кој наводно целел руски брод во Средоземното Море.
Истрагата е сè уште во тек, додека украинската страна негира каква било поврзаност со дронот.
Атина претходно ги информираше сојузниците на НАТО и Европската Унија за инцидентот, изразувајќи страв дека конфликтот во Црното Море би можел да се прелее во Егејското и Средоземното Море.