Косовската полиција потврди дека денеска имало закана за експлозивна направа до Собранието на Косово, испратена преку СМС порака, јави Газета Експрес.
„Денес, на 05.07.2025 година наутро, примена е информација (преку СМС порака) за закана со експлозивна направа во државниот објект на Косовското собрание. По добивањето на информацијата, ангажирани се надлежните полициски единици, кои првично воспоставија безбедносен периметар и евакуираа луѓе од просториите“.
Косовската полиција соопшти дека ги известила надлежните обвинителства и полициските истражители, кои заедно со надлежните единици за деминирање и експерти, преземаат соодветни контролни мерки во објектот.
Членовите на Собранието, персоналот и медиумите беа евакуирани кратко пред почетокот на конститутивната седница, која беше закажана да започне во 11:00 часот.
Некои од пратениците кои разговараа со новинарите по евакуацијата рекоа дека добиле инструкции од косовската полиција да ја напуштат собраниската сала.
Некои од нив го критикуваа безбедносниот систем на Собранието, а други рекоа дека оваа закана може да биде лажна.
Собранието сè уште не објави кога ќе продолжи седницата, додека припадниците на косовската полиција вршат проверки.