Американските воени авиони привремено стационирани на аеродромот во Софија имаат рок да ја напуштат Бугарија до крајот на јуни, како одговор на неукинувањето на визите за САД на бугарските државјани.
„На последниот состанок на Министерскиот совет објавив дека за време на разговорот со претседателот на САД побарав укинување на визите за бугарските граѓани. Досега не добив позитивен одговор. Целосно ја разбирам сложеноста на регулаторните процедури и потребата од време. Но, и ние имаме свои приоритети и процедури и не можеме позитивно да одговориме на барањето за долг престој на авионите-цистерни на аеродромот во Софија. Затоа, денес ќе донесеме одлука за продолжување на нивниот престој до крајот на јуни, со цел да им дадеме можност на нашите сојузници да ги прилагодат своите активности и да најдат други локации“, изјави премиерот Радев.
Авионите на военото воздухопловство на САД првпат беа забележани на аеродромот „Васил Левски“ на 19 февруари 2026 година. Во тоа време, Министерството за одбрана официјално го потврди нивното присуство, вклучувајќи ги и авионите KC-135 стратотанкер, што укажува дека учествувале во активности поврзани со „засилената будност на НАТО“.
На 17 февруари амбасадата на САД во Софија испрати дипломатска нота до бугарските власти барајќи распоредување на максимум 15 авиони на истиот аеродром до 31 мај. Според Министерството за одбрана, авионите се логистички и немаат офанзивни функции. Дозвола за нивно распоредување даде Владата на тогашниот премиер Росен Желјасков.