Спасувачките екипи во Словенија интензивно трагаат по 19-годишен државјанин на Србија, кој исчезнал во саботата додека се искачувал на Триглав, највисокиот врв на Јулиските Алпи.
Младиот планинар тргнал по исклучително тешката патека преку Племенице, позната и како Бамбергова патека, по што му се губи секоја трага.
Словенечката полиција го примила известувањето за исчезнувањето во неделата, 1 ноември, нешто пред 20 часот. Во потрагата веднаш се вклучиле спасувачките служби од Бовец и Мојстрана.
На височина од 2.130 метри спасувачите пронашле предмети што му припаѓаат на исчезнатиот млад човек. Денеска претпладне забележале и траги од движење во снегот, кои се спуштале до околу 1.900 метри надморска височина.
Таму трагите престанале, бидејќи биле избришани од силниот ветер. Во истото подрачје биле пронајдени и уште неколку негови лични предмети.
Лошите временски услови дополнително ја отежнуваат потрагата. Поради силниот ветер и облачноста, хеликоптерите не можат да полетаат, соопштиле од Полициската управа Нова Горица.
Патеката преку Племенице важи за една од најтешките обележани планинарски патеки на Триглав. Таа минува низ стрмни и изложени делови од планината, каде што снегот, мразот и силниот ветер ја зголемуваат опасноста.
Потрагата продолжува под раководство на Полициската станица Бовец. Засега нема информации што му се случило на 19-годишникот ниту каде се наоѓа.