На Генералното собрание на Европската слободна алијанса (ЕФА), европското политичко семејство кое ги претставува народите, регионите и малцинствата во Европскиот парламент, беше едногласно усвоена резолуцијата поднесена од Македонската алијанса за европска интеграција (МАЕИ) – „Заштита на македонското малцинство во Албанија и заштита на правата на малцинствата во процесот на проширување на ЕУ“.
Во објава на социјалните мрежи, Васил Стерјиовски, претседател на единствената партија на Македонците во Албанија, Македонска алијанса за европска интеграција, МАЕИ вели дека во обраќање пред делегатите на Генералното собрание ги претставаил предизвиците со кои се соочува македонската заедница во Албанија, како и нашата борба за еднаквост, достоинство и почитување на основните човекови права.
„Со усвоената резолуција, ЕФА јасно бара од албанските власти целосно да ги гарантираат и спроведат правата на Македонците во Албанија, да обезбедат образование на македонски јазик, праведно политичко претставување и рамномерен развој на регионите населени со Македонци.
Воедно, резолуцијата ја осудува политиката на негирање и асимилација на Македонците во Албанија преку надворешни политички притисоци од страна на Бугарија и ја повикува Европската комисија да покрене истрага за состојбата со македонското малцинство во Албанија“ пишува Стерјовски.
Тој додава дека ваквата поддршка од европското семејство на малцинствата и народите претставува силна порака дека Европа се гради врз почитување на различностите, правото на самоидентификација и заштитата на човековите права.
„Благодарност до сите партии-членки на ЕФА за нивната едногласна поддршка и солидарност со македонската заедница во Албанија.
Нашата борба продолжува, смело, достоинствено и гордо. Ќе продолжиме да се залагаме за правата на Македонците во Албанија, уверени дека вистината, правдата и европските вредности ќе победат.
Гласот на Македонците од Албанија се слуша во Европа“ порачува Стерјовски.