Фудбалските федерации на Македонија и на Босна и Херцеговина потврдија дека репрезентациите на двете земји ќе одиграат пријателски натпревар на 29 мај во Сараево, кој за БиХ ќе биде проверка пред Светското првенство во САД, Мексико и Канада.
Мечот ќе се одигра на стадионот „Асим Ферхатовиќ-Хасе“ („Кошево“), со капацитет од 34.500 места за седење, кој се очекува да биде исполнет до последното место среде еуфоријата по баражот и елиминацијата на Италија на пенали во Зеница и избореното второ учество на мундијалите.
Тоа ќе биде шести меѓусебен дуел, сите досега пријателски, со нерешен скор: по една победа за двете селекции и три реми.
Неколку дена подоцна се очекува „црвено-жолтите“ да му спарингуваат на уште еден учесник на мундијалот, Турција, за што се чека потврда.
