Ракометарите на АЕК ги стигна кармата по неславното бегство од реваншот со Алкалоид во финалето на Европскиот куп, што ги чинеше пехарот во третото клупско натпреварување на ЕХФ по ранг, па тимот од Атина остана и без шампионската титула во Грција.
Во мајсторката од финалето на плејофот АЕК загуби со 32:30 на свој терен од Олимпијакос во натпревар одигран пред празни трибини по казната за домашниот тим поради однесувањето на неговите навивачи, истите тие што му се заканија на тимот да не го одигра возвратниот дуел со Алкалоид во Скопје по поразот од 29:25 во првиот меч дома!
Тука не завршува неволјата за АЕК, бидејќи го чекаат санкции и од ЕХФ за самоволието во финалето на Европскиот куп, покрај астрономска парична казна од ЕХФ најверојатно и забрана за настап во еврокуповите, па единствената светла точка сезонава ќе му остане триумфот во Купот на Грција.