Ракометарите на Вардар ѝ ставија крај на серијата од четири порази од Еурофарм Пелистер во сите конкуренции, добивајќи го суперлигашкото дерби полно со тензии на теренот и на трибините во „Јане Сандански“ со 31:28.
Двократниот европски првак имаше предност во најголемиот дел од средбата, најмногу со три гола разлика, на полувреме водеше со 16:14, но пелистерци се закануваа до самиот крај, во вториот дел и израмнија на 18:18, пред Филип Талески во завршницата со неколку влезови завршени со погодоци да го реши победникот.
Николас Боно, Жуниор Тузолана и Јака Малус беа најефикасни кај победникот со по 6 гола, три помалку од Дејан Манасков во поразениот тим.
Ракометната пресметка на вечните ривали двапати беше во прекин, прво по остриот старт на Вуко Борозан врз Филип Кузмановски, кој по прегледувањето на снимката беше санкциониран со директен црвен картон за Црногорецот, а потоа и поради искрите меѓу двете навивачки групи. „Чкембарите“ фрлија факел на теренот, „комитите“ се обидоа да влезат на теренот и да дојдат до нив за физички да се пресметаат, но беа спречени, па десет минути траеше смирувањето на страстите за мечот да продолжи.
Петтата победа во исто толку првенствени средби сезонава ги зацврсти „црвено-црните“ на врвот на табелата со 10 бода, два повеќе од Алкалоид и од Бутел, а шампионот е четврти со 7.