Американската Пацифичка флота вчера соопшти дека во Јужното Кинеско Море, кратко време еден по друг, се урнале воен хеликоптер и борбен авион по полетувањето од носачот на авиони USS Nimitz.
„Сите членови на екипажот се спасени и се во стабилна состојба“, објави флотата на платформата „X“, додавајќи дека причините за двата инцидента се предмет на истрага.
Хеликоптерот MH-60R Sea Hawk се урнал околу 14:45 часот по локално време за време на рутинска операција, кратко по полетувањето од носачот. Сите тројца членови на екипажот биле успешно спасени. Половина час подоцна, во 15:15 часот, борбениот авион F/A-18F Super Hornet исто така се урнал во Јужното Кинеско Море за време на рутинска мисија. Двајцата пилоти биле спасени.
Точната локација на несреќите не е обелоденета. Американската морнарица редовно спроведува операции во меѓународните води на овој регион, со цел, како што тврди, да ја поддржи слободата на пловидба во област што е клучна за глобалните бродски патишта.
Кина, која претендира на речиси целото Јужнокинеско Море, во последните години презема сè порешителни активности во регионот, игнорирајќи ја пресудата од 2016 година на меѓународниот арбитражен суд, според која нејзините територијални претензии немаат правна или историска основа. Покрај Кина, Филипините, Виетнам, Малезија, Брунеи и Тајван исто така имаат територијални претензии кон оваа област, позната по богатите природни ресурси и важноста како глобална бродска рута.