Стратешки бомбардер Б-52 Стратофортрес се урна денеска кратко по полетувањето од воздухопловната база Едвардс во пустината Мохаве во Калифорнија, соопштија од американската воена база.
Несреќата е пријавена околу 11:20 часот по локално време.
Екипите за итни случаи веднаш беа испратени на местото на несреќата, кое се наоѓа на околу 160 километри северно од Лос Анџелес.
Во официјална објава на Фејсбук, воздухопловната база Едвардс соопшти дека дополнителни информации за инцидентот, состојбата на екипажот и причината за несреќата ќе бидат објавени за јавноста штом ќе станат достапни.
Бомбардерот Б-52 Стратофортрес е столб на американската стратешка авијација веќе седум децении, а цената по примерок е околу 95 милиони долари.
Тоа е масивен авион со осум мотори, кој може да носи до 32 тони нуклеарно или конвенционално оружје на растојание од повеќе од 14.000 километри без дополнување гориво.
Оперативните трошоци се исклучително високи и изнесуваат околу 70.000 долари за еден час летање, поради што САД моментално инвестираат милијарди долари во модернизација на моторите и радарите за да ја одржат оваа флота во употреба до 2050 година.