Бројот на жртви од рускиот напад врз Киев во текот на ноќта се искачи на 25, објави вечерва шефот на градската воена администрација, Тимур Ткаченко.
Тој објави на Телеграм дека операциите за пребарување и расчистување на урнатините сè уште се во тек на една од локациите во областа Дарница во Киев, па затоа е можно да бидат пронајдени повеќе тела, објави Укринформ.
Претходно беше објавено дека најмалку 21 лице загинало во рускиот напад врз Киев.
Се огласи и украинскиот претседател Володимир Зеленски, кој во разговор со финскиот колега Александар Стубе побара ракети за противвоздушните системи „Патриот“.
„Важно е светот да не молчи за денешниот исклучително циничен руски напад врз нашиот народ. Ви благодарам за вашите зборови на сочувство и подготвеност да ни помогнете. Балистичката ракетна одбрана е невозможна без доволен број ракети за системите „Патриот“. Ова е наш највисок приоритет во моментов. Разговаравме кои партнери можат да помогнат и како точно. Ќе работиме на тоа“, порача Зеленски.
Од Москва, пак, масовниот напад со балистички проектили со долг дострел и со ударни дронови го објаснија како одмазда за украинските напади врз руска територија.