Советот на ЕУ денеска одлучи повторно да воведе рестриктивни мерки кон Иран поради неговите нуклеарни активности, кои беа укинати во 2015 година по стапувањето во сила на Заедничкиот акциски план, познат како нуклеарен договор со Иран. Одлуката следува откако Велика Британија, Германија и Франција го активираа механизмот за враќање на санкциите, предвиден во договорот, поради проценката дека Иран „значително не ги исполнува“ своите обврски, што беше објавено на 28 август 2025 година.
Санкциите вклучуваат забрана за патување во ЕУ за лица поврзани со иранската нуклеарна програма, замрзнување на средствата на физички и правни лица, како и забрана за ставање на располагање економски ресурси. Дополнително, се забранува извоз на оружје, материјали, добра и технологии што можат да се користат за збогатување на нуклеарни горива или за балистички ракети. Увозот на нафта, природен гас, петрохемиски и нафтени деривати, како и опрема за енергетскиот сектор, поморски уреди, одреден софтвер, злато, благородни метали и дијаманти, исто така е забранет.
Средствата на Централната банка на Иран и на главните ирански комерцијални банки во ЕУ се замрзнати, а на иранските транспортни авиони им е забранет пристап до аеродромите во ЕУ, вклучително и нивно одржување. Исто така, бродовите што превезуваат санкционирани материјали нема да се сервисираат.
Нуклеарниот договор од 14 јули 2015 година, потпишан меѓу Иран и петте постојани членки на Советот за безбедност на ОН (Велика Британија, Кина, Русија, САД, Франција) плус Германија, предвидуваше мерки за осигурување дека иранската нуклеарна програма е исклучиво за цивилни цели. Во октомври 2015 година, Советот за безбедност на ОН со резолуција ги укина санкциите, но договорот дозволува нивно повторно воведување во случај на неисполнување на обврските од страна на Иран. Откако Советот за безбедност на ОН не усвои нова резолуција за спречување на санкциите, тие повторно стапија во сила.