Словачкиот премиер Роберт Фицо му се закани на украинскиот претседател Володимир Зеленски со прекин во испораката на електрична енергија ако до понеделник не биде обновено функционирањето на нафтоводот „Дружба“ низ Украина, од кој Словачка се снабдува со руска нафта.
„Ако украинскиот претседател до понеделник не го обнови снабдувањето со нафта на Словачка, истиот ден ќе побарам од надлежните словачки компании да ги запрат итните испораки на електрична енергија за Украина“, изјави Фицо.
Тој го обвини Зеленски дека се однесува злонамерно кон Братислава, прво со запрената испорака на гас што, според него, ѝ предизвикала годишна штета на неговата земја од половина милијарда евра, а запирањето и на нафтата ќе создаде дополнителни загуби.
Фицо нагласи дека Словачка тоа со ништо не го заслужила од Украина, на која ѝ помага од почетокот на војната со Русија, примајќи 180.000 украински бегалци, обезбедувајќи ѝ хуманитарна помош и организирајќи заеднички седници на двете влади.
„Словачка прави многу повеќе од некои други земји“, истакна шефот на словачката Влада, додавајќи дека односите меѓу двете држави не можат да бидат еднонасочна улица и оти Словачка како суверена и горда држава не може да прифати однос од кој корист има само Украина.