Министрот за надворешни работи на Хрватска, Гордан Грлиќ Радман, потврди дека хрватскиот конзул и неговата сопруга се повредени во ирански напад врз Тел Авив.
Како што објави на социјалната мрежа X, зградата каде што живеат била погодена.
„Разговарав со нив лично и за среќа, повредите се полесни и не се опасни по живот“, рече министерот.
Тој додаде дека Министерството е во постојан контакт со амбасадата и дека се преземаат сите мерки за да се обезбеди безбедноста на хрватските граѓани во Израел.
„Остро ги осудуваме нападите врз цивилни и дипломатски објекти“, реагираше Грлиќ Радман.
Иранските ракетни напади врз израелска територија дојдоа како одговор на израелските воздушни напади врз цели во Иран, кои, според израелската војска, вклучуваа воени и нуклеарни објекти.
Израел претходно изјави дека операцијата имала за цел да го спречи Иран да развие нуклеарно оружје и да ја намали заканата од балистички ракети.
Во петокот навечер, Техеран испали десетици ракети, од кои некои ја погодија областа на Тел Авив и околните градови.
Според достапните информации, во нападите загинаа три лица, а десетици беа повредени.
Тоа беше еден од најмоќните директни напади на Иран врз израелска територија досега.