Израел даде конечно одобрение за изградба на 764 станбени единици во три населби на окупираниот Западен Брег, изјави министерот за финансии Безалел Смотрих, цитиран од Ројтерс.
Смотрих, ултранационалист кој се противи на создавањето палестинска држава, рече дека откако го започнал својот мандат кон крајот на 2022 година, околу 51.370 станбени единици се одобрени од страна на Врховниот совет за планирање на владата на Западниот Брег, територија што Палестинците ја бараат за идна држава.
Еврејски доселеници напаѓаат Палестинци и палат домови (ВИДЕО)
„Ние ја продолжуваме револуцијата“, рече Смотрих во соопштението, додавајќи дека најновото одобрување на станбените единици „е дел од јасен стратешки процес за зајакнување на населбите и обезбедување континуитет на животот, безбедноста и растот… и вистинска загриженост за иднината на Државата Израел“.
Повеќето светски сили ги сметаат израелските населби – на земјиште што го освои во војната во 1967 година – за нелегални, а повеќе резолуции на Советот за безбедност на ОН го повикаа Израел да ги запре сите активности за населување.
„За нас, сите населби се нелегални… и тие се спротивни на сите резолуции со меѓународен легитимитет“, изјави за Ројтерс Васел Абу Јусеф, член на извршниот комитет на Организацијата за ослободување на Палестина.
Израел вели дека населбите се клучни за неговата безбедност и имаат библиски, историски и политички врски со територијата.
Нападите на израелските доселеници врз Палестинците се во пораст. Најмалку 264 напади врз Палестинци се регистрирани на Западниот Брег во октомври, што е најголем месечен број откако претставниците на ОН почнаа да ги следат ваквите инциденти во 2006 година, според извештај на ОН.