Израелскиот ремиер Бенјамин Нетанјаху инсистира дека нема да има палестинска држава, дури и по цена на нормализација со Саудиска Арабија, за време на интервју емитувано во четврток вечерта, јавува Тајмс од Израел.
„Нема да има палестинска држава. Многу е едноставно: нема да биде воспоставена“, рече премиерот во опширното интервју за популарен локален Телеграм канал..
На прашањето дали неговото противење останува дури и ако тоа ја загрозува нормализацијата со Ријад – кој инсистира на кредибилен пат кон палестинска државност во замена за такви врски – Нетанјаху рече:
„Одговорот е: палестинска држава нема да биде воспоставена. Тоа е егзистенцијална закана за Израел“.
Порано во текот на неделата, саудискиот престолонаследник Мохамед бин Салман изјави дека Ријад повика на потребата да се обезбеди пат кон решение за две држави, додека се сретна со американскиот претседател Доналд Трамп во Белата куќа.
Осврнувајќи се на Појасот Газа, Нетанјаху изјави за телевизијата дека Израел ќе го отвори повторно граничниот премин Рафа на границата Египет-Газа откако ќе ги прими тројцата преостанати починати заложници од Хамас, додавајќи дека Израел е „многу блиску до завршување“ на процесот.
„Се согласивме дека ќе го отвориме преминот откако ќе ги примиме сите наши заложници. Многу сме блиску до завршување на овој процес – тоа треба да се случи – и откако тоа ќе биде завршено, ќе го отвориме преминот“, рече премиерот.
Нетанјаху додаде дека, откако ќе бидат вратени сите заложници и преминот ќе биде повторно отворен, тој „ќе биде многу среќен да види како Египет му дозволува на секој жител на Газа кој сака да замине [низ преминот] да го стори тоа – бидејќи тоа не се случило до денес“.
„Секој жител на Газа кој сака да замине треба да може, а тоа право му е одбиено“, продолжи тој, додавајќи дека планот на Вашингтон од 20 точки за Газа „го вклучува тоа право: тој го поставува принципот дека секој жител на Газа кој сака да замине може да замине. Не протеруваме никого, но ако некој сака да замине, нека си замине. Ако Египет го прифати тоа – мислам дека тоа е многу позитивно“.