Папата Лав Четиринаесетти денес, го прослави својот 70-ти роденден, но и покрај јубилејот, неговиот дневен распоред остана исполнет со работни обврски, изјавија италијанските медиуми. Ватикан не организираше официјална свеченост по повод роденденот, но верниците на плоштадот Свети Петар го поздравија папата со песна, носејќи плакати и балони со натписи „Среќен роденден“. Во својата традиционална неделна молитва Ангел Господов, папата изрази благодарност: „Мои сакани, како што изгледа знаете, денеска наполнив 70 години. Му благодарам на Бог, на моите роднини и на сите кои ме спомнуваат во своите молитви.“
Лав Четиринаесетти, кој беше избран за папа на 69-годишна возраст, стана најмладиот кардинал избран за поглавар на Римокатоличката црква од 1978 година, кога Полјакот Карол Војтила беше избран за папа Јован Павле Втори на 58 години. За својот роденден, папата доби бројни честитки, вклучително и цртежи од деца испратени по пошта до Ватикан, како и чоколадна торта од новиот американски амбасадор во Ватикан. Подоцна денеска, тој ќе присуствува на црковен настан во базиликата „Сан Паоло фуори ле мура“ во Рим, продолжувајќи со своите обврски. Неговите роднини во САД и августинското семејство, од кое потекнува, исто така планираат да го одбележат јубилејот.
Честитки пристигнаа и од високи италијански функционери. Претседателот Серџо Матарела во својата порака напиша: „На денот на Вашиот 70-ти роденден, ве молам да ги прифатите најсрдечните честитки, кои со задоволство ви ги упатувам во име на италијанскиот народ, заедно со моите искрени желби за духовна и лична благосостојба.“ Тој додаде дека Италија ќе продолжи да соработува со папата, гледајќи во неговите пораки за почитување на човекот, служењето и единството одраз на уставните вредности, и изрази надеж за скорешна посета на папата во палатата „Квиринале“. Италијанската премиерка Џорџа Мелони, на Фејсбук, истакна дека „неговите зборови и учења се извор на инспирација во сложени времиња“, додавајќи дека италијанскиот народ секогаш ќе му ја пружа својата љубов и посветеност. Честитки упатија и претседателите на Сенатот и Долниот дом на италијанскиот парламент, нагласувајќи ја улогата на папата во промовирањето на мир и единство.