Руските научници развија нова вакцина против рак која е подготвена за клиничка употреба, објави раководителката на Федералната медицинска и биолошка агенција (ФМБА), Вероника Скворцова, на Источниот економски форум во Владивосток.
Вакцината, наречена „Ентеромикс“, користи мРНА-технологија, истата што се користи во некои вакцини за Ковид-19. Наместо ослабен вирус, вакцините ги учат клетките на телото да произведуваат протеини кои стимулираат имунолошки одговор против клетките на ракот.
Според Скворцова, вакцината е подложена на години истражување, вклучувајќи три години задолжителни претклинички испитувања. Резултатите покажуваат дека е безбедна дури и со повеќекратни дози и многу ефикасна: кај некои пациенти туморите се намалуваат или растат побавно за 60-80 отсто, во зависност од видот на рак. Истражувачите, исто така, забележале подобрени стапки на преживување.
Првичниот фокус ќе биде на ракот на дебелото црево, а се развиваат вакцини и против глиобластом, брзорастечки рак на мозокот и одредени видови меланом, вклучувајќи го и очниот меланом.
Вакцината беше најавена на 10. Источен економски форум, на кој учествуваа повеќе од 8.400 учесници од повеќе од 75 земји.