Поделбата на Појасот Газа на области контролирани од Израел и области контролирани од Хамас е сè поверојатна, изјавија повеќе извори за Ројтерс, бидејќи напорите за проширување на мировниот план на американскиот претседател Доналд Трамп за прекин на огнот се’ повеќе заглавуваат.
Шест европски претставници директно вклучени во напорите за спроведување на следната фаза од планот изјавија за Ројтерс дека напорите ефикасно се заглавени и сега се чини веројатно дека реконструкцијата ќе биде ограничена на територијата контролирана од Израел.
Тоа би можело да доведе до години поделба на два дела, предупредија тие.
Според првата фаза од планот, која стапи на сила вчера, израелската војска сега контролира 53 проценти од крајбрежната енклава, вклучувајќи го поголемиот дел од земјоделското земјиште, Рафа на југ и делови од градот Газа и други урбани области.
Речиси сите два милиони жители на Газа живеат во шаторски кампови и во урнатините на уништените градови.
Следната фаза предвидува понатамошно повлекување на Израел од таканаречената жолта линија до која се повлекоа израелските војници според условите на прекинот на огнот, како и воспоставување на преодна администрација во Газа, испраќање мултинационални безбедносни сили кои ќе ги заменат израелските, разоружување на Хамас и почеток на реконструкцијата.
Но, планот не обезбеди никаква временска рамка или механизми за имплементација.
Во меѓувреме, Хамас одбива да се разоружа, а Израел отфрла какво било инсталирање палестинската власт поддржана од Запад, а постои и неизвесност околу мултинационалните трупи.
Без поголем притисок од САД за прекин на ќорсокакот, Жолтата линија се чини дека ќе стане де факто граница што ќе ја дели Газа на неодредено време, според 18 извори.
САД изготвија резолуција на Советот за безбедност на Обединетите нации со која ќе им се даде на мултинационалните сили и на преодната администрација двегодишен мандат.
Но, 10 дипломати рекоа дека владите сè уште се двоумат дали да испратат војници.
Европските и арапските земји е особено малку веројатно да учествуваат ако задачите се протегаат надвор од мировните операции или ако тие вклучуваат директна конфронтација со Хамас или други палестински групи, рекоа тие.
Портпаролот на Стејт департментот рече дека иако е постигнат „огромен напредок“ според планот на Трамп, останува уште многу работа, но тој не одговори на прашањата дали реконструкцијата ќе биде ограничена на територијата под израелска администрација.
Премиерот Бенјамин Нетанјаху рече дека Израел нема намера повторно да ја окупира или управува со Газа, иако министрите од крајната десница во неговата влада повикаа на оживување на населбите срушени во 2005 година.
Израелската војска, исто така, се спротивстави на барањата за трајна окупација на териториите или директен надзор на цивилите во Газа.
Наместо тоа, Нетанјаху вети дека ќе одржува тампон-зона во Газа, по должината на границата, за да се спречи какво било повторување на нападот од Хамас од октомври 2023 година, што ја предизвика војната.
Израелските сили поставија големи жолти бетонски блокови за да ја означат линијата на повлекување и градат инфраструктура на страната од Газа што ја контролираат.