Швајцарија прогласи петдневна жалост по пожарот во популарен бар во скијачкиот центар Кран-Монтана, во кој загинаа повеќе од 40 лица, а 115 беа повредени.
Знамињата на институциите во земјата ќе бидат спуштени на половина копје во тој период.
Швајцарскиот претседател Ги Пармелин го опиша пожарот како еден од најтрагичните настани во историјата на земјата и рече дека Швајцарија има должност да обезбеди таква трагедија никогаш повеќе да не се случи.
Несреќата се случила за време на новогодишната прослава, а барот „Ле констеласион“ бил полн со млади луѓе, меѓу кои и туристи од други европски земји.
Според исказите на очевидци, пожарот избувнал околу 1:30 часот по полноќ, кога во барот биле фрлени шишиња шампањ со прскалки и ракети, предизвикувајќи експлозија што брзо ги зафатила таванот и поширокиот простор.
Пожарот се проширил брзо и зафатил цел подрум каде што имало многу млади луѓе, вклучувајќи и тинејџери.
Сведоците тврдат дека луѓето се обиделе да избегаат во паника, но се заглавиле поради тесните скали. Пожарот предизвикал огромна паника и ужасни сцени, а екипите за итни случаи и пожарникарите пристигнале на местото на трагедијата во рекордно време.
Медицински работници ги превезоа повредените во болниците во Сион, Женева, Лозана и Цирих. Некои преживеани претрпеа тешки изгореници и повреди на белите дробови, а шест лица се во критична состојба. Иако причината за пожарот сè уште не е целосно утврдена, истрагата е во тек.