Одделот за контраразузнавање на Украинската безбедносна служба (СБУ) уапси двајца кинески државјани во Киев поради обид за кражба на доверлива документација за украинскиот ракетен систем РК-360МЦ „Нептун“, објавија украинските медиуми.
Според истрагата, еден од приведените е 24-годишен поранешен студент на Техничкиот универзитет во Киев, кој останал во Украина откако бил избркан во 2023 година поради слаб академски успех.
Другиот осомничен е неговиот татко, кинески државјанин кој живее во Кина, но често патувал во Украина за лично да ги координира шпионските активности на својот син, објави СБУ.
Поранешниот студент наводно имал задача да добие техничка документација за развојот и производството на ракетата Нептун. За таа цел, тој се обидел да регрутира украински државјанин со пристап до чувствителни воени технологии, објави СБУ, а пренесе Индекс.хр.
Службениците за контраразузнавање на СБУ го идентификувале на почетокот од операцијата и го уапсиле на дело додека собирал доверливи материјали.
Неговиот татко бил исто така уапсен кратко потоа, додека се подготвувал да ги пренесе собраните информации на кинеските разузнавачки служби.
За време на операцијата беа спроведени претреси, а меѓу пронајдените докази беа мобилни телефони со пораки што потврдуваат договори и координација на шпионски активности меѓу татко и син, соопшти СБУ.
Врз основа на собраните докази, на двајцата мажи официјално им беше доставено известување за сомневање за шпионажа, согласно член 114, став 1 од Кривичниот законик на Украина. Доколку бидат прогласени за виновни, тие се соочуваат со затворска казна до 15 години и конфискација на имот, се заклучува во соопштението.
Инаку, RK-360MC „Нептун“ е украинска крстосувачка ракета противбродска, развиена од дизајнерското биро Луч со седиште во Киев. Таа е базирана на советската ракета H-35, но со подобрувања во дострелот, електрониката и системот за водење. Наменета е за уништување на површински воени бродови и транспортни бродови до 9.000 тони депласман, без разлика дали се движат во конвој или самостојно.
Ракетата има дострел до 300 километри и носи боева глава со тежина од 150 килограми. Стапи во оперативна употреба во 2021 година, а познато е по тоа што беше употребен за потопување на рускиот крстосувач „Москва“ во 2022 година, што означи значаен успех за украинските вооружени сили во одбраната на Црното Море.