Специјалниот претставник на рускиот претседател Владимир Путин за инвестиции и економска соработка, Кирил Дмитриев, во интервју за Си-Ен-Ен во Вашингтон изјави дека е убеден дека Русија, САД и Украина се многу блиску до постигнување дипломатско решение за завршување на војната во Украина.
Подоцна, Дмитриев додаде дека планираната средба меѓу Доналд Трамп и Путин не е откажана, како што претходно објави американскиот претседател, и дека двајцата светски лидери најверојатно ќе се сретнат во иднина.
Трамп моментално е во Катар, на почетната станица од неговата обемна азиска турнеја, која ќе кулминира со средба со кинескиот претседател Си Џинпинг во четврток. Американскиот претседател изрази надеж за „многу добар состанок“ со кинескиот лидер и очекува Пекинг да постигне спогодба за избегнување на дополнителните царини од 100 проценти, кои треба да ступат во сила на 1 ноември.
Меѓувремено, Трамп истакна дека е „отворен“ за состанок со севернокорејскиот лидер Ким Џонг Ун за време на турнејата, која претставува негова прва посета на регионот откако се врати на власт во јануари. Тој ќе ги посети Малезија, Јапонија и Јужна Кореја.
Во Куала Лумпур, американскиот претседател ќе присуствува на самитот на Асоцијацијата на земјите од Југоисточна Азија (АСЕАН) денеска, настан кој во текот на неговиот прв мандат често го игнорираше. Се предвидува дека ќе склучи трговски договор со Малезија и ќе биде сведок на потпишувањето на мировниот договор меѓу Тајланд и Камбоџа, со кој формално се потврдува прекинот на огнот од 29 јули.
Трамп утре ќе отпатува за Јапонија, каде наредниот ден ќе се сретне со Санае Такаичи, која минатата недела стана првата жена премиер на јапонската влада.
Турнејата ќе заврши во Јужна Кореја, каде Трамп ќе присуствува на самитот на Азиско-пацифичката економска соработка (АПЕК), кој започнува в среда, а на неговите маргини ќе има средба со Си Џинпинг во Гјонгџу во четврток.