Цените на нафтата скокнаа по извештаите дека САД се подготвуваат за „продолжена“ блокада на Иран.
Глобалната цена на суровата нафта Брент во вторникот достигна 126 долари за барел, што е највисоко ниво од 2022 година.
Фјучерсите на „брент“ за јуни скокнаа за 6,8% и достигнаа 126 долари за барел, што е највисоко ниво од март 2022 година, на почетокот на Руско-украинската војна.
Договорот за јуни истекува денеска, додека јулските фјучерси пораснаа за 3,4% на 114,19 долари.
Би-Би-Си дознава дека раководителите на енергетските компании, се сретнале со американскиот претседател Доналд Трамп во Белата куќа во вторникот. Темата на дискусија била како да се ублажи влијанието на конфликтот врз американските потрошувачи.
Трговците со нафта очигледно го протолкувале состанокот како знак дека блокадата на Ормутскиот теснец, клучен за глобалното снабдување, ќе трае. Според функционер на Белата куќа, на состанокот се разговарало за домашното производство на енергија, напредокот во Венецуела, фјучерсите за нафта, природниот гас и превозот. Средбата била опишана како дел од редовните состаноци на претседателот со раководителите на енергетскиот сектор.
Веста доаѓа по извештаите во Волстрит џурнал дека американскиот претседател Доналд Трамп им наредил на своите помошници да се подготват за продолжување на сегашната блокада на иранските пристаништа, во обид да се изврши дополнителен притисок врз економијата на земјата.
Цените на нафтата остро осцилираат од почетокот на војната, а клучниот Ормутски теснец е практично затворен со недели поради конфликтот.
Иран строго го ограничи превозот низ теснецот, кој пренесува околу една петтина од светската нафта и течен природен гас, како одговор на нападите на САД и Израел што започнаа на 28 февруари.