Благодарение на активната дипломатија, сосема е реално да се финализираат чекорите потребни за да се утврди како достоинствено да се заврши војната во наредните денови, изјави украинскиот претседател Володимир Зеленски во синоќешното видео обраќање, јави Укринформ.
Денеска, украинската делегација ќе биде во Флорида, каде што дијалогот ќе продолжи врз основа на точките дискутирани во Женева.
Американскиот државен секретар Марко Рубио и специјалниот претставник Стив Виткоф ќе се сретнат со украинската делегација. На состанокот ќе учествува и зетот на американскиот претседател Доналд Трамп, Џаред Кушнер.
„Дипломатијата останува активна. Американската страна демонстрира конструктивен пристап и во наредните денови е можно да се разјаснат чекорите за да се утврди како достоинствено да се заврши војната“, рече Зеленски.
„Украинската делегација ги има потребните насоки и очекувам момците да работат во согласност со јасните украински приоритети“, истакна тој.
Како што беше претходно објавено, Зеленски го промени составот на делегацијата за преговори со САД и други меѓународни партнери, како и со претставници на Русија за мир. Сега делегацијата ја предводи секретарот на Советот за национална безбедност и одбрана, Рустем Умеров.
Зеленски, исто така, даде нови директиви за украинската делегација што учествува во процесот на преговори со САД и други меѓународни партнери, како и со претставници на Русија, за постигнување праведен и траен мир.